Kryetari i Sindikatës së Policisë së Kosovës, tha se protesta është opsioni i fundit për policinë. Kjo pasi që ata shpresojnë të gjejnë ende zgjidhje duke dialoguar me Qeverinë.
“Tërheqja e Trustit nuk është kërkesë prioritare e Policisë së Kosovës. Për ne protesta është fjala e fundit, atë nuk e kemi thënë ende dhe nuk do ta themi derisa t’i harxhojmë të gjitha mundësitë e dialogut me Qeverinë. Prandaj, për ne është dytësore tërheqja e Trustit në krahasim me disa kërkesa që kemi më madhore dhe më kredibile për Policinë e Kosovës”, deklaroi ai në emisionin “Infonata”.
Edhe pse Zeqiri përkrah protestën e nesërme për lejimin e tërheqjes së parave nga Trusti, ai mendon se kjo zgjidhje nuk është e duhur dhe afatgjate.
“Tërheqja e Trustit nuk është një zgjidhje afatgjatë, për shkak se ato mjete edhe në qoftë se i lejon Qeveria e Kosovës, ato janë mjete të punëtorëve dhe nuk janë ndihmë nga Qeveria. Në një farë forme ne vetëm do ta varfërojmë fondin tonë për të cilin dihet se për çfarë ruhen ato para”, tha më tej ai.
Punëtorët e Korporatës Energjetike të Kosovës (KEK) pritet që nesër të protestojnë para Qeverisë së Kosovës, ku si arsye është kërkesa për votimin e ndryshimit të Projektligjit të Fondit Pensional që lejon tërheqjen e kursimeve. Ndërsa është raportuar se do protestojnë edhe nga Sindikata e Policisë, megjithatë Zeqiri tha se mbështesin protestën por se nuk marrin pjesë.
