Profesori universitar, Dashamir Bërxulli, ka komentuar vizitën e kryeministrit Albin Kurti në Paris, ku ky i fundit ka folur për procesin gjyqësor ndaj ish-krerëve të Ushtrisë Çlirimtare të Kosovës dhe përgatitjet për ankesën ndaj vendimit të gjykatës.
Në emisionin “Këndi i debatit” në Tëvë1, Bërxulli ka vlerësuar se Kurti është treguar i kujdesshëm në deklarimet e tij, duke shmangur komentet mbi detajet e brendshme të procesit të përgatitjes së apelit.
“Është shumë i kujdesshëm, sepse nuk hyn në dinamikat e brendshme të procesit të përgatitjes së apelit. Me opinionin ndërkombëtar, veçanërisht atë evropian, duhet të jesh shumë i kujdesshëm se çfarë thotë kryeministri i Kosovës. Në rast se do të shkonte me deklarime të tjera, atëherë do të hynte në një zonë që do të konsiderohej si një faull, sepse do të thuhej se kryeministri nuk duhet të japë përshtypjen se ekzekutivi i një vendi përfshihet në pengimin e drejtësisë apo në çështje të rëndësishme që kanë të bëjnë me drejtësinë e pavarur”, ka thënë Bërxulli.
Ai ka shtuar se Kurti ka qenë i shkurtër dhe konciz në mesazhet e tij, duke theksuar se Kosova do të ndjekë rrugën e apelit dhe do të përgatitet për të, pa hyrë në detaje të mëtejshme.
Sipas Bërxullit, përmes këtyre deklarimeve, Kurti ka përcjellë mesazhin se Kosova e respekton pavarësinë e gjyqësorit.
