Zeqiri ka deklaruar se janë takuar me drejtorin e Byrosë Kosovare të Sigurimeve që të bëjnë një sigurim alternativ, pasi sipas tij, Ligji mbi sigurimin shëndetësor nëse fillon sot, nuk ka gjasa që të implementohet të paktën para 3 viteve.
“Ministri Sveçla është shumë i interesuar për të realizuar këtë, por nuk na ka dhënë ndonjë përgjigje konkrete si, por ne kemi punuar si sindikatë në këtë drejtim. Jemi takuar me drejtorin e Byrosë Kosovare të Sigurimeve që të bëjmë një sigurim alternativ për arsye se Ligji mbi sigurimin shëndetësor nëse sot fillon, nuk ka gjasa para 3 apo 5 viteve që të implementohet. Ne si sindikatë kemi kërkuar me këmbëngulje që këtë vit të startojmë me një sigurim alternativ i cili është i mundshëm dhe nuk është i përballueshëm edhe për qeverinë që të jepet një shumë e parave”, tha ai në emisionin “Ditari” në Tëvë1.
Po ashtu, Zeqiri thotë se ka kërkuar 5 milionë euro nga Qeveria për sigurim shëndetësor për një vit për punonjësit e Policisë së Kosovës.
“Unë kam kërkuar një 5 milionë euro për sigurim shëndetësor për një vit për punonjësit e Policisë së Kosovës që jemi rreth 9 mijë e 200 pjesëtar duke përfshirë edhe pjesën e stafit civil. Një 5 milionë për qeverinë nuk është e papërballueshme. Nuk është problem a do ta bëjmë projektin ne apo Qeveria, por e them me shumë përgjegjësi do të ishte nder jo vetëm për këtë qeveri apo qeveritë e kaluara që të startonin me një sigurim shëndetësor për Policinë”, ka thënë Zeqiri. /teve1.info/
