Analisti politik Florent Zeqaj, në emisionin “Këndi i debatit” në Tëvë1, ka folur për Kuvendin e Lidhjes Demokratike të Kosovës (LDK), i cili u mbajt të shtunën, ku u diskutua çështja e udhëheqjes së partisë.
Sipas Zeqajt, ndonëse kryetari aktual Lumir Abdixhiku kishte kërkuar dorëheqjen, delegatët vendosën që ai të vazhdojë të jetë në krye të LDK-së.
“Unë, në bazë të informacioneve që kam, vullneti nuk ka qenë për z. Abdixhiku, sepse numrat po na lënë të kuptojmë shumë. Edhe debati pas Kuvendit flet mjaft, madje edhe vetë fjalimi i z. Abdixhiku tregon se ai kishte një fjalim, ta quajmë, kërcënues ndaj të padëgjueshmëve të LDK-së, të cilët janë figura mjaft të fuqishme”, ka thënë Zeqaj.
Ai ka shtuar se kishte mungesë komunikimi mes figurave të rëndësishme brenda partisë para votimit të besimit.
“Kam informacion se një ditë para votës së besimit, z. Abdixhiku dhe Xhafer Tahiri nuk kanë pasur komunikim. Vetëm një ditë para se të ndodhte kjo votë, me iniciativën e Vjosa Osmanit, ka ndodhur një pajtim”, ka deklaruar Zeqaj.
Sipas analistit, ndikimi i presidentes Osmani në LDK vazhdon të jetë i konsiderueshëm.
“Vjosa Osmani ka një ndikim mjaft të madh në LDK, bile te z. Abdixhiku shumë. Edhe pse Osmani është jashtë strukturave të partisë, me zemër dhe me ndjenja ajo është te rugovizmi, siç e ka deklaruar edhe vetë”, ka përfunduar Zeqaj.
