Analisti politik Florent Zeqaj, në emisionin “Këndi i debatit” në Tëvë1, ka folur për vendimin e Komisionit Qendror të Zgjedhjeve (KQZ) për të mos shpallur rezultatet përfundimtare të Listës Serbe, si dhe për ankesën e këtij subjekti politik në Panelin Zgjedhor për Ankesa dhe Parashtresa (PZAP), e cila është pranuar.
Zeqaj ka vlerësuar se institucionet dhe Qeveria e Kosovës është dashur të veprojnë më herët ndaj Listës Serbe, pa pritur vendime të tjera institucionale.
“Është dashur të veprohet edhe me Listën Serbe. Qeveria nuk është dashur të luajë rolin e ‘politikës me bisht të çiftelisë’. Përderisa ka pasur mundësinë për të vepruar, nuk ka qenë nevoja të pritet prokuroria,” ka thënë Zeqaj.
Ai ka përmendur edhe rastin e mbylljes së disa strukturave në veri, duke theksuar se në ato raste Qeveria ka vepruar pa pritur vendime nga prokuroria.
“Te rasti i rojeve të urave nuk është pritur prokuroria, as vendimi i saj. Qeveria ka dalë dhe ka vepruar. Ka të drejtë Qeveria ta shpallë një organizatë kur e di që është e rrezikshme, qoftë organizatë apo subjekt politik,” ka deklaruar Zeqaj.
Sipas tij, krijimi i një diskursi publik se Lista Serbe është e rrezikshme, pa veprime konkrete institucionale, është i pamjaftueshëm.
“Nuk mjafton të thuhet në opinion publik se ‘këta janë kriminelë’ apo ‘organizata terroriste’. Nëse është kështu, atëherë duhet t’i shpallë shteti. Në këtë rast është dashur menjëherë të ketë reagim institucional, të nxirren raporte dhe të ushtrohet presion edhe nga faktori ndërkombëtar, përfshirë angazhimin e Ministrisë së Punëve të Jashtme me homologët e saj,” ka shtuar ai.
