Gazetari Florent Zeqaj ka komentuar heqjen e masave të Bashkimit Evropian ndaj Kosovës, duke theksuar se vendi ka pasur obligim t’i zbatojë marrëveshjet ndërkombëtare për të shmangur pasojat.
Në emisionin “Këndi i Debatit” në Tëvë1, Zeqaj u shpreh se çdo veprim që dëmton shtetin duhet parë me seriozitet, por shtoi se përgjegjësia bie mbi institucionet kur nuk i zbatojnë marrëveshjet e pranuara.
“Çdo gjë që vjen në dëm të shtetit të Kosovës duhet të cilësohet si e tillë, por kjo nuk përfundon këtu. Kur hyn në marrëveshje me faktorin ndërkombëtar, ke obligim dhe përgjegjësi si shtet që t’i zbatosh ato. Mund t’i kundërshtosh, por në momentin që i pranon, atëherë duhet t’i jetësosh, përndryshe është e logjikshme që pasojnë sanksione”, ka thënë Zeqaj.
Ai e cilësoi si lajm të mirë heqjen e sanksioneve nga BE-ja, por shtroi pyetjen se çfarë ka dhënë Kosova në këmbim.
“Është lajm i mirë që u hoqën sanksionet nga BE-ja, por mbetet të shihet se çfarë lëshimesh ka bërë Kosova. Qeveria është dashur të bëjë hapa dhe të trajtojë çështjen e strukturave paralele serbe që të arrihet deri te heqja e masave”, u shpreh ai.
