Gazetari Florent Zeqaj, në emisionin “Këndi i debatit” në Tëvë1, ka zbuluar detaje interesante mbi zhvillimet e fundit politike dhe ngërçin institucional për konstituimin e Kuvendit të Kosovës.
Sipas Zeqirajt, kryeministri në detyrë, Albin Kurti, nuk është i gatshëm ta mbështesë Fatmir Limajn për postin e kryetarit të Kuvendit. Ai shtoi se, bazuar në informacionet që ai posedon, ka pasur një ofertë konkrete ndaj Limajt për një post ministror që në ditën e parë të negociatave, por Limaj nuk e ka pranuar, pasi nuk i është përshtatur.
“Unë e kam thënë edhe më herët që z. Kurti nuk e bën Fatmir Limajn kryetar të Kuvendit. Sipas informatave që kam, është në shqyrtim mundësia që Limaj të zëvendësohet nga një femër, si përpjekje për të dalë nga ky ngërç,” tha Zeqiraj gjatë debatit.
Ai theksoi se kjo zgjidhje është duke u parë si një opsion serioz nga partitë që janë të përfshira në negociata, në mënyrë që të përshpejtohet procesi i konstituimit të institucioneve dhe të tejkalohet bllokada aktuale.
