Dogana e Kosovës ka zbuluar një rast të tentim-futjes së mallrave të padeklaruara gjatë një kontrolli rutinë në zyrën doganore të brendshme në Ferizaj.
Sipas njoftimit, gjatë kontrollit të një mauneje, një shtetas i huaj është vërejtur duke nxjerrë dy pako nga kabina e mjetit, i cili ndodhej në procedurë doganore.
Pas kontrollit fizik, zyrtarët kanë konstatuar se brenda pakove ndodheshin gjithsej 896 produkte të llojit “MOSPORT 500”, që përdoren për trajtime mjekësore.
Autoritetet kanë bërë të ditur se plumbat doganorë dhe litari sigurues i mjetit nuk kishin dëmtime, ndërsa mjeti ka qenë nën mbikëqyrje të vazhdueshme.
Vlera e përgjithshme e mallit të padeklaruar është vlerësuar rreth 26 mijë e 700 euro.
“Dogana e Kosovës ka ndërmarrë të gjitha veprimet e nevojshme ligjore, përfshirë ndalimin e përkohshëm të mallit dhe procedimin e mëtejmë të rastit në përputhje me legjislacionin në fuqi. Dogana e Kosovës mbetet e përkushtuar në luftimin e aktiviteteve të kundërligjshme dhe në mbrojtjen e shëndetit publik, duke parandaluar futjen në treg të produkteve të padeklaruara dhe potencialisht të rrezikshme”, theksohet në fund të njoftimit./teve1.info/
