E mbuluar nga ngjyra e gjelbër dhe me një histori 500 vjeçare.
Xhamia në fshatin Greme të Ferizajt, bart në vete ngjarje të shumta.
Ndër pjesët më të lavdishme, është shërbimi si shkollë dhe strehë për ushtarët e Ushtrisë Çlirimtare të Kosovës.
Kujtime të shumta në njërën prej xhamive më të vjetra në Kosovë, ka hoxha Halim Cakolli.
“Prej para luftës e këndej kjo ka shërbyer si shkollë kur forcat serbe i kanë larguar me dhunë shumë nxënës nga shkolla për mos me mësuar, por kjo e ka luajtur rolin e vet si shkollë në atë kohë. Atëherë shumë gjenerata janë shkolluar këtu edhe kemi nxënës. Duke ju falënderuar atyre njerëzve që kanë pasur kureshtjen edhe forcën për mos me u ndal mësimi është bë kjo, por fal edhe katunit që kanë pasur dëshirë që kjo me lujt rolin e vet edhe si shkollë. Sepse në fakt edhe xhamia e ka edhe këtë rol me i mësuar njerëzit, me i edukuar njerëzit nuk ka ndonjë rol negativ kudo në botë”, tregon hoxha Halim Cakolli.
Në luftë, xhamia u shndërrua në fortesë për ushtarët e UÇK-së.
“Gjatë luftës ka qenë qendër e UÇK-së dhe njerëzit kanë qëndruar këtu janë mbyll këtu, kanë bë këtu roje dhe këtu gati se ka qenë pika përfundimtarë ndërmjet fshatit dhe qytetit dhe e malit andej. E këtu sipas ushtarëve shumë herë edhe janë kthyer edhe forcat serbe, deri këtu kanë ardhur e këtu kanë hasur në rezistencë dhe janë larguar nga mbrapa. Është çudi që ka mbetur akoma kjo xhami, është e restaurime sepse koha e ka bërë të vetën”, thotë imami.
Në këtë xhami, Cakolli rrëfen se e mbajti edhe një prej ligjëratave të para si imam.
“Kur kam qenë student në Kajro e që kam ardh në pushime verore, Këshilli i Bashkësisë Islame më ka thënë se duhet me shku me fal një xhuma pasi që imami i kësaj xhamia është i sëmurë. Kam ardh e kam fal një xhuma e pastaj edhe të dytën sepse hoxha nuk ka mundur. E kam hip në hydbe këtu dhe i kam mbajtur dy xhuma, dy ligjërata që kanë qenë interesante. Përshtypja ka qenë e mirë sepse me i pri një mexhidi, një xhamie kaq të vjetër është edhe privilegj edhe para njerëzve edhe para Allahut”, shprehet ai.
Përveç në raste të caktuara, xhamia prej kohësh nuk është në funksion. Mirëpo ka mbetur një objekt i rëndësishëm i trashëgimisë kulturore të Kosovës.
