Ish-kryetari i komunës së Vushtrrisë, Xhafer Tahiri, ka njoftuar rikthimin e tij në garën për kryetar të kësaj komune.
Tahiri përmes një postimi në Facebook theksoi se vendimi është marrë pas një reflektimi të gjatë dhe konsultimesh me familjen, bashkëpunëtorët dhe qytetarët e Vushtrrisë.
“Po, po i rikthehem garës për kryetar të komunës sonë. Nuk është ambicia ajo që më shtyn. Është ndjenja që ende ka shumë punë për të përfunduar, shumë projekte për t’u realizuar dhe shumë shpresë për t’u kthyer në realitet,” shkroi Tahiri.
Duke kujtuar periudhën e kaluar në detyrë, ai u zotua se do të vijojë rrugën e filluar me përkushtim e ndershmëri, duke ofruar një alternativë të bazuar në njohjen reale të problemeve të qytetit.
“Vushtrria nuk ka nevojë për spektakël, ka nevojë për punë”, theksoi ai, duke shtuar se është gati të përballet me sfidat dhe të ndërtojë një të ardhme më të mirë për qytetin dhe qytetarët e tij.
