Ambasadori i Suedisë, vendit që udhëheq me presidencën e BE-së ka folur për çështjen e aplikimit të Kosovës për anëtarësim në Bashkimin Evropian.
Jonas Westerlund në një intervistë për Tëvë 1 ka thënë se Suedia do të luajë një rol neutral për këtë çështje dhe se janë në konsultime të vazhdueshme me shtetet e BE-së.
Ai ka shtuar se tani është çështja nëse aplikimi duhet t’i dorëzohet Komisionit Evropian.
“Pyetja kryesore është nëse ne duhet apo jo t’ia dorëzojmë aplikimin e Kosovës, Komisionit Evropian, prandaj jemi ne kontakt edhe me 5 shtetet që nuk e kanë njohur Kosovën, ta shohim se çfarë pikëpamje kanë ato. Do të presim se çfarë do të ndodhë, por ne natyrisht që duhet t’i diskutojmë këto çështje me të tjerët”, ka shtuar Westerlund në një intervistë për Tëvë 1.
Kosova ka aplikuar për anëtarësim në BE më 15 dhjetor të vitit të kaluar.
