Presidenti i Serbisë, Aleksandër Vuçiq, ka biseduar sot në telefon me këshilltarin në Departamentin e Shtetit të SHBA-së, Derek Chollet.
Siç ka njoftuar zyra e presidentit serb Vuçiq, Chollet i ka thënë atij se ShBA-ja mbështet propozimin evropian dhe se duhet të zbatohen marrëveshjet e arritura në kuadër të dialogut.
“Diplomati amerikan theksoi se SHBA-të e mbështesin plotësisht propozimin e BE-së për normalizimin e marrëdhënieve ndërmjet Beogradit dhe Prishtinës dhe se pret që takimi i nesërm në Bruksel të jetë konstruktiv, me përparim të dukshëm drejt marrëveshjes. Chollet po ashtu tha se duhet të zbatohen marrëveshjet e nënshkruara më parë në procesin e dialogut, që nënkupton edhe themelimin e Bashkimit të Komunave Serbe”, thuhet në njoftim.
Ndërsa Vuçiq i ka thënë se pret një takim shumë të vështirë, por se Serbia është e përkushtuar për paqen dhe stabilitetin në rajon dhe se në këtë kontekst është i gatshëm të punojë në konceptin dhe zbatimin e planit të propozuar me “kufizime të përcaktuara qartë”.
