“Mos lypni fajtor ose mos fajësoni askënd”, ishin fjalët që la përmes një letre Heroinë Mehmetaj, para se t’ia merrte jetën vetes.
Por, babai dhe dy vëllezërit e saj, dyshohet se nuk qëndruan duarkryq.
Gati një vit pas kësaj humbje, ata dyshohet se planifikuan dhe ekzekutuan një vrasje të rëndë.
Caku dyshohet të ketë qenë shoferi i autobusit, Gani Gjokaj, i cili thuhej se kishte pasur lidhje me Heroinë Mehmetaj.
Por, në sulmin e mbrëmjes së 26 nëntorit të vitit 2021, nuk pësoi vetëm Gjokaj.
Nga sulmi me armë zjarri ndaj autobusit në Gllogjan, e pësuan tragjikisht edhe dy nxënës.
Për këtë vrasje të trefishtë, ndaj Halil Mehmetaj, Kastriot dhe Kreshnik Mehmetaj, Prokuroria Themelore në Pejë, po kërkon dënim me burgim të përjetshëm.
Sipas prokurores, motivi i kësaj ngjarje ishte hakmarrja, e cila ishte paralajmëruar qysh në varrimin e Heroinë Mehmetaj.
Në fjalën e saj përfundimtare, prokurorja dha detaje se si e kishin përshkruar momentin kritik nxënësit e tjerë që ndodheshin në autobus.
Prokurorja përmblodhi edhe dëshmitë e dëshmitarëve për lëvizjet e tre të akuzuarve, pak momente pas aktit makabër.
Pas arrestimit të të akuzuarve, ishin kryer bastisje në shtëpinë e tyre, ku ishin gjetur sasi e madhe e municionit.
Përkundër gjithë këtyre akuzave, në momentet e pauzave shkaku i temperaturave të larta, të akuzuarit dukeshin në disponim të mirë.
Të enjten fjalën e morën edhe prindërit e dy nxënësve të vrarë, të cilët kërkuan dënim maksimal për të tre të akuzuarit.
Gjyqi për vrasjen e trefishtë në Gllogjan, do të vazhdojë me dhënien e fjalëve përfundimtare të palëve të tjera në procedurë.
