Sindikata e Policisë së Kosovës e ka dënuar vrasjen e rreshterit Muhamed Lika në Kaçanik, i cili vdiq mbrëmë pas plagëve të marra nga arma e zjarrit.
Sindikata e Policisë vrasjen e rreshterit policor e ka cilësuar cilësuar atentat dhe sulm të drejtpërdrejtë ndaj sigurisë publike dhe vetë shtetit të Kosovës.
“Çdo sulm ndaj një zyrtari policor është sulm ndaj Republikës së Kosovës! Policia e Kosovës është shtylla kryesore e rendit dhe sigurisë në vend. Prekja e saj është përpjekje për të minuar themelet e shtetit tonë dhe nuk do të tolerohet”, thuhet në reagimin e Sindikatës.
Sindikata ka bërë thirrje për veprime të menjëhershme nga institucionet e drejtësisë për të hetuar dhe ndëshkuar autorët e këtij akti kriminal.
“Sindikata e Policisë së Kosovës qëndron e palëkundur në mbështetje të çdo pjesëtari të saj dhe nuk do të lejojmë që aktet e tilla të frikësimit të lëkundin përkushtimin tonë ndaj detyrës dhe Republikës. Nder dhe lavdi për sakrificën e Rreshter Muhamed Lika!”, theksohet në reagim./teve1.info/
