Janë në një aktakuzë të përbashkët, si të akuzuar për një vjedhje, realizimi i së cilës llogaritet se u bë si në filma.
Pesë të akuzuarit, Bujar Basha, Korab Gashi, Besart Istrefi, Trim Baraku dhe Leutrim Cakolli, po vazhdojnë përballjen me drejtësinë që nga viti 2025.
Sipas aktakuzës, të pandehurit më 22 nëntor të vitit 2023, në argjendarinë Daikos në Suharekë, me përdorim të forcës dhe kanosjes serioze për të sulmuar jetën e personit tjetër, duke vepruar si anëtarë të grupit të armatosur, përvetësojnë pasurinë e luajtshme të personave tjerë, me qëllim të dobisë pasurore për anëtarët e tjerë të grupit.
E gjithë kjo skenë, që rezultoi me grabitjen e stolive të arit prej 3 kilogramë e 71 gramë, në vlerë prej 133 mijë e 711 euro, ndodhi në orët e pasdites.
Gjyqi ndaj pesëshes vazhdoi me dëgjimin e një dëshmitari.
Ai është personi i cili ua shiti veturën me të cilën dyshohet se është kryer vepra.
“E kanë ble veturën, domethënë ua kam shitë. Më kanë thanë që po e marrin për pjesë se e kanë një kerr të njëjtë”, tha Rinor Sadiku – dëshmitar.
Dëshmitari thotë se veturën ua shiti dy personave, derisa i përshkroi pak edhe pamjen e jashtme të tyre.
“Të dytë kanë qenë me mjekrra”, tregoi ai.
Përpos këtij dëshmitari ishin planifikuar të dëgjoheshin edhe dy të tjerë.
Njëri nuk u paraqit fare, kurse tjetri kishte kërkuar të dëshmonte pa praninë e të akuzuarve, për shkak se ndihet i rrezikuar.
“E thotë kërkesën që me dëshmu jashtë sallës”, tha Ervehe Gashi – prokurore.
Kjo u kundërshtua nga mbrojtja e të akuzuarve.
Propozimi i prokurores, solli reagim edhe të të akuzuarit, Bujar Basha.
Në lidhje me këtë dëshmitar, Gjykata vendosi që i njëjti të dëgjohet në sallë gjyqi.
Mirëpo, për deklarimin e këtij dëshmitarit, mediat nuk u lejuan të xhirojnë.
