Pesë diplomatë të Perëndimit më 21 tetor nisin vizitat në Kosovë dhe Serbi, ku synim kryesor do të jetë ringjallja e dialogut mes dy vendeve.
Me ç’rast, deputeti i Lëvizjes Vetëvendosje, Arbër Rexhaj, vlerësoi që liderët evropianë po vijnë me idenë që marrëveshja e dakorduar në Ohër, të ketë zbatueshmëri të plotë.
“Me sa unë mund ta lexojë këtë situatë, ata vijnë me idenë që marrëveshja e Ohrit të zbatohet në plotni. Në marrëveshjen e dakorduar, në njërën prej pikave thotë që as Kosova as Serbia, s’duhet ta prekin sovranitetin, aspektin territorial dhe të mos e pengojnë njëra tjetrën në aspekt të brendshëm. Mirëpo, e patëm sulmin terrorist në Banjskë, ku u faktua nga institucionet tona të sigurisë që është i ardhur nga Serbia, u faktua që armët të cilat u gjetën nuk mund të blihen në tregun e lirë, u faktua që armët janë prodhuar në fabrikat shtetërore të Serbisë”, deklaroi Rexhaj në emisionin “Infonata”.
Megjithatë, deputeti i VV-së, konsideroi që nuk mund të ketë normalizim të marrëdhënieve, pa heqjen e masave ndëshkuese për Kosovën.
“Përsëri, Kosova në këto masa ndëshkuese dhe në kërkesat që i bëhen Kosovës, janë të padrejta. Po, nesër sigurisht do të flitet për marrëveshjen e Ohrit. Mirëpo, nuk mund të shkojmë përpara pa e pasur heqjen e masave ndëshkuese që i ka Kosova”, potencoi tutje Rexhaj në Tëvë1.
Pesëshja diplomatike vjen në Kosovë gati një muaj pas agresionit të Serbisë në Kosovë, teksa kryeministri i vendit, Albin Kurti, dje deklaroi se për kërkesat dhe ofertat e tyre do të merret vesh të shtunën.
Ndërsa, sipas njoftimit të kryeministrisë, Kurti do t’i presë diplomatët në orën 10:00./teve1.info/.
