Situata me zjarret vazhdon të jetë ende e rënduar në disa zona të Kosovës.
Sfidë të tillë pati edhe Komuna e Klinës.
Një ditë më parë, në përballje me zjarre, disa fshatra të kësaj komune pësuan dëme të konsiderueshme materiale.
Por këtë të premte, gjendja atje ishte e mirë.
Një nga zjarrfikësit që u sfidua nga këto zjarre bëri të ditur për televizionin se aktualisht nuk ka ndonjë vatër aktive.
Mirëpo për zjarrin e së enjtes, Elmi Zenunaj, tha se u është dashur ndihmë edhe nga komunat e tjera.
“Fatkeqësisht për shkak të erës së madhe ne nuk kemi pasur mundësi me ju dal në ndihmë qytetarëve aq sa duhet, por pastaj na ka dal në ndihmë edhe gjashtë komunat tjera, edhe FSK-ja dhe në orët e vona të mbramjes ka përfundu zjarri me sukses, pa viktima”, tha Zenunaj.
Në gjithë Klinën, sipas Zenunajt, janë vetëm 14 zjarrfikës.
Kjo siç thotë ai, ua vështirëson edhe më shumë punën e tyre.
“Dihet botërisht që shërbimi i zjarrfiksave ka mungesë të stafit, edhe në Klinë edhe në nivel të Kosovës. Megjithatë Klina është shumë keq, jemi vetëm 14 zjarrëfikësa, të cilët tre janë në pushim mjekësor. Edhe ndrimin për momentin e kemi me dy zjarrfika”, tha ai.
Nga njoftimi i fundit i Agjencisë së Menaxhimit Emergjent, aktualisht në nivel vendi janë regjistruar 97 vatra zjarri.
Nga këto 26 vazhdojë të jenë aktive, ndërsa 71 janë lokalizuar.
Për të parandaluar raste të tilla, AME dhe Policia e Kosovës vazhdimisht kanë bërë apel te qytetarët që të tregohen të kujdesshëm dhe të shmangin çdo veprim që mund të shkaktojë zjarr.
Kronikë e realizuar nga gazetarja, Adea Mustafaj.
