Seanca fillestare u mbajt në qershor të vitit të kaluar.
Për 53 të akuzuarit për Masakrën e Mejes, u lexua aktakuza e Prokurorisë Speciale dhe Gjykata Themelore në Prishtinë ishte bindur që gjykimi në këtë rast të zhvillohet në mungesë.
Mirëpo, një ankesë e disa prej mbrojtësve të të akuzuarve, bëri që Apeli ta kthente rastin në rivendosje.
Sipas vendimit të shkallës së dytë, Themelorja kishte zhvilluar seancë në mungesë të të akuzuarve pa u përmbushur kushtet ligjore.
Me këtë rast, Prokuroria Speciale ka bërë ndryshime në aktakuzë, dhe të njëjtën e ka publikuar në Gazetë Zyrtare.
Aty mes tjerash renditen veprimet e ndërmarra nga ky institucion për ta siguruar prezencën e 53 të pandehurve.
Sipas Flamur Kabashit nga IKD, tani pritet që kjo aktakuzë ta merrë formën e prerë nga Gjykata, në mënyrë që të vazhdohet tutje.
“Pasi të përfundojë faza e kundërshtimit të provave dhe kërkesës për hudhje të aktakuzës, dhe aktakuza të merrë formën e prerë nga ana e Apelit dhe procesi lëshohet në shqyrtim gjyqësor, dëgjohen dëshmitarët, elaborohen provat materiale dhe personale, pra nëse ka prova shkresore, thjeshtë gjykimi zhvillohet sikur gjykimet e tjera mirëpo në mungesë të të akuzuarve”, shprehet Flamur Kabashi nga IKD.
Këto raste të masakrave të luftës, vlerësohet se do duhej të trajtoheshin me prioritet dhe pa vonesa.
“Ndryshimi i tillë, i hapë rrugë Gjykatës që të fillojë me procesin gjyqësor atu ku është lënë, domethënë të fillohet rishtazi, dhe të vazhdohet me procedurë. A është e rëndësishme, po sigurisht që është e rëndësishmë, këto lëndë janë me rëndësi jetike sidomos për viktimat dhe familjet e viktimave, që presin drejtësi dhe sigurisht që duhet të procedohen sa më shpejt që është e mmundur” , thotw avokati, Visar Rrecaj.
Mosbashkëpunimi i autoriteteve serbe për këto lloj krimesh, sipas tij, përkundër që paraqet pengesë, në rast të ndonjë bashkëpunimi as nuk do të mund të merreshin seriozisht.
“Konsideroj se e pengon mirëpo, edhe bashkëpunimi eventual do duhej të merrej me rezerva të mëdha sepse nuk pritet që të dorëzojë prova apo materiale të besueshme”, shprehet ai.
Në këtë aktakuzë, ndodhen 53 të akuzuar, që të gjithë në arrati, mbi supet e të cilëve rëndojnë akuzat për vrasjen e 370 civilëve në Mejë dhe fshatrat tjera të Gjakovës, rrahje, maltretim e dëbim të civilëve dhe shkatërrim të pasurive.
