Janë këto fjalët e Flamur Bazajt, pronarit të një biznesi në Drenas.
Bazaj i cili tash e disa vite ka këtu lokalin pohon se vërshimet e ngjashme si këto të ditëve të fundit, i bënë dëme edhe viteve të kaluara.
E faj për këtë ai i vë Komunës.
“Nuk është hera e parë që po ndodh ky problem është vazhdimisht është si pasojë e çrregullimit të lumit i cili është ende pa rregulluar. Ky problem shfaqet çdo tri apo katër vite, janari është gjithë i rrezikshëm për ne. E Komuna nuk ka investuar në rregullimin e lumit Drenica e si pasojë është bërë kështu, jemi të bllokuar”, thotë Bazaj.
Dëmet financiare, Bazaj tregon se për të janë mjaft të larta.
“Këtë vit përafërsisht rreth 10 mijë euro, se inventari, pjesët e telefonave, pajisjet elektronike, kompjuterët, telefonat. Nuk na është dhënë mundësia me i tërheqë se uji e ka përfshirë krejt hapësirë s’kemi pas mundësi qysh me i tërheqë”, tregon ai.
Për këtë problematikë të kamotshme ai ka një kërkesë konkrete drejtuar të parit të Komunës së Drenasit.
“Kërkesa ime kryesorë kryetarit të Komunës është që të bëjë zgjidhje të rregulloj shtratin e lumit në pjesën tjetër, kah fshatrat me zgjeruar se përndryshe unë automatikisht jam duke biseduar edhe me familjarë e me krejt me u tërheqë prej këtij vendi se hera e dytë është që më ka bërë dëme e asnjë kompensimi”, shprehet pronari i biznesit në Drenas.
Drejtori për Shërbime Publike në Drenas ka deklaruar se gjatë këtyre ditëve do të bëhet vlerësimi i dëmeve të shkaktuara nga vërshimet.
