Në Podujevë është vënë gurthemeli i Qendrës Multifunksionale, një projekt i bashkëfinancuar mes Komunës dhe Ministrisë së Kulturës, Rinisë dhe Sportit dhe që kap vlerën rreth 1 milion euro, në një sipërfaqe prej rreth 1450 metra katrorë.
Kryeministri Albin Kurti tha se ky investim është në kuadër të reformës për rininë dhe se rinia e Podujevës meriton më shumë.
“Andaj edhe ne do të bëjmë çmos që t’i dalim borxh asaj në mënyrë që përfitimi edhe për vetë rininë por edhe për shtetin dhe të ardhmen të jenë sa më të mëdha”, është shprehur ai, thuhet në njoftimin e Zyrës së Kryeministrit.
Teksa kryetari i komunës Shpejtim Bulliqi, tha se me këtë qendër, rinisë së Podujevës do t’i krijohen kushte më të mira.
“Kjo qendër multifunksionale e cila në total kap një sipërfaqe diku rreth 1450 m2, dhe e cila tani e tutje do t’ju shërbejë rinisë tonë, për arsye se deri tash aktivitetet e tyre i kanë zhvilluar në një sallë, palestër sportive në kushte improvizimi dhe besoj që me ndërtimin e këtij objekti këtyre të rinjve, sigurisht që do t’ju krijohen kushte shumë më të mira, më të përshtatshme për punë, pa i abstrahuar edhe OJQ-të e ndryshme, të cilat funksionojnë brenda komunës tonë, ku kanë me pas qasjen dhe mundësinë që bashkërisht t’i kryejnë aktivitetet e veta”, shtoi Bulliqi.
Qendra multifunksionale e Podujevës kap shumën afër një milion euro dhe do t’i ketë katër salla multifunksionale, amfiteatrin, hapësirën për ngjarje publike, sallën e mbledhjeve, administratën, dhe depot. Kohëzgjatja e punimeve për realizimin e këtij projekti parashihet të jetë 26 muaj.
