Një dakordim që çmimi i rrymës të mos rritet, u arrit.
Marrëveshja u realizua mes Koorporatës Energjetike të Kosovës dhe Kompanisë Kosovare për Furnizim me Energji Elektrike.
Në këtë mënyrë, siç u tha, po tentohet të ruhet stabilitet energjetik.
“KEK Sh.A. ka arritur një marrëveshje që siguron stabilitet tarifor dhe mbron konsumatorët nga rritja e çmimit të energjisë për vitin 2026. Shmanget rritja e tarifave, ruhet stabiliteti i furnizimit me energji, dhe mbrohen interesat e konsumatorëve”, thuhet në njoftimin e KEK-ut.
Ky vendim u mirëprit nga qytetarët.
Megjithëse thonë se është dashur të mirret më herët.
“Është dashur më herët e jo tash kur është zënë me ora të falsifikuara edhe ne si popull kemi faj që ka faj që nuk qohemi në protestë”, u shpreh një qytetar.
“…është mirë që kanë marrë vendim, por është kanë mirë me shiku edhe çmimi ekzistues sa është në nivel a është sa duhet, apo mos është më i lartë sesa që duhet”, ka thënë një qytetar tjetër.
E një tjetër konsumator ka një thirrje.
“Qeveria dhe të gjitha institucionet duhet me punu në këtë drejtim, mos me lanë me u shtrenjtu rryma, se qytetarët janë në gjendje jo të mirë ekonomike”, theksoj një qytetar tjetër.
Anipse vendim i duhur, ekonomistët kanë drojë se si do veprohet tutje.
“Për vitin 2026 kjo është një shenjë shumë e mirë e kësaj marrëveshje. Mirëpo unë nuk besoj që viti 2027 do të ketë marrëveshje pasi që do të kemi rritje të çmimit të energjisë elektrike. Për shkak se nuk kemi bërë zgjidhje e përderisa nuk bënë zgjidhje kërkesa e konsumit është me e madhe sesa kapacitetet prodhuese. Njëfarë forme vlen që duhet me importuar energji elektrike, importi nganjëherë tek ne në Kosovë është adhoc për shkak të problemeve me termocentrale”, u shpreh Misini.
Në prill të vitit 2025, energjia elektrike me kërkesë të KESCO-s, ishte shtrenjtuar për 16.1%.
