Fëmija dyvjeçar, i cili u soll në Klinikën e Neurokirurgjisë natën e Vitit të Ri me një fragment metali të panjohur të ngulur në kokë, vdiq dy orë pas mesnatës.
Ky informacion u konfirmua për “Sloboden Peçat” nga Ministria e Punëve të Brendshme. Lajmin e konfirmuan edhe për MIA-n Klinika e Neurokirurgjisë në Shkup, duke treguar se interpretime të mëtejshme do të priten pas rezultateve të autopsisë.
Jeta e fëmijës ishte në rrezik që nga momenti që u pranua dhe u trajtua në Klinikën e Neurokirurgjisë.
Edhe Ministria e Shëndetësisë dha detaje.
“Fëmija u pranua në Qendrën e Urgjencës dhe, për shkak të gjendjes së rëndë shëndetësore, u transferua për trajtim në Klinikën e Neurokirurgjisë, në repartin e kujdesit intensiv.
Ai u intubua, u vendos në ventilim mekanik, iu administrua terapi antibiotike dhe antiedematoze, si dhe ishte nën monitorim të vazhdueshëm 24-orësh. Shkalla e dëmtimit të indit trunor nuk lejoi ndërhyrje kirurgjikale. Pavarësisht përpjekjeve maksimale të ekipit mjekësor, përfundimi ishte tragjik.
Edhe nga Prokuroria Themelore Publike kanë konfirmuar vdekjen e fëmijës dy vjeçar.
“Në lidhje me fëmijën dyvjeçar që ka ndërruar jetë, Prokuroria Themelore Publike Shkup ka lëshuar urdhër për obduksion të trupit”, thonë nga Prokuroria.
Fëmija u dërgua fillimisht në Klinikën “Shën Naum i Ohrit”, por për shkak të ashpërsisë së lëndimeve të tij, ai u transferua urgjentisht në kirurgjinë pediatrike.
Ministri i Brendshëm, Pançe Toshkovski dje në një konferencë për shtyp tha se ky ishte një nga incidentet më të rënda gjatë natës së ndërrimit të viteve./tvshenja/
