Kryetari i Aleancës për Ardhmërinë e Kosovës, Ramush Haradinaj, ka bërë apel për çdo pjesëmarrës në komunikacion, pas aksidenteve me fatalitet që kanë ndodhur në mbrëmjen e së shtunës.
Haradinaj ka apeluar për kujdes të shtuar dhe respektim të rregullave.
“Me shqetësim dhe dhimbje të thellë po i përcjell lajmet për tragjeditë në komunikacion, të cilat rezultuan me humbje jete, fatkeqësisht. Apeloj te çdo pjesëmarrës në komunikacion për kujdes të shtuar dhe respektim të rregullave. Nuk është vetëm jeta juaj në lojë, por edhe jeta e të tjerëve!”, ka shkruar Haradinaj në Facebook.
Tutje, ai ka bërë thirrje edhe ndaj Policisë së Kosovës, ku thotë të jenë vigjilent dhe të pakompromis ndaj personave që shkelin rregullat e komunikacionit.
“Apeloj Policinë e Kosovës të jenë vigjilent dhe të pakompromis ndaj atyre që shkelin rregullat e komunikacionit dhe sigurinë. Bashkëndjejmë me familjet e viktimave, lutemi për shërim sa më të shpejt të të lënduarve!”, ka shkruar tutje Haradinaj./teve1.info/
