Ka kaluar ora 14:00, koha e paraparë për vazhdimin e seancës konstituive të Kuvendit të Kosovës, por seanca ende nuk ka nisur.
Në rend dite është zgjedhja e nënkryetarëve të Kuvendit, ndërsa deputetët ende nuk janë rikthyer në sallë për vazhdimin e punimeve.
Seanca e orës 11:00, e cila kishte nisur me vonesë, u ndërpre pasi deputetët e Partisë Demokratike të Kosovës lëshuan sallën, pas mosvotimit të kandidates së tyre për nënkryetare, Vlora Çitaku, nga deputetët e Lëvizjes Vetëvendosje.
Kryetarja e Kuvendit, Albulena Haxhiu, e kishte ftuar PDK-në të propozojë një kandidat tjetër, por një propozim i ri nuk u bë.
“Seanca ndërpritet. Për vazhdimin e seancës do të njoftoheni më pas”, kishte deklaruar Haxhiu.
Para ndërprerjes, Ardian Gola i LVV-së ishte zgjedhur nënkryetar i Kuvendit me 101 vota për.
Seanca ishte paraparë të vazhdonte në orën 14:00, por deri tani nuk ka nisur.
