Sulmuesi i krahut, Valmir Veliu është futbollisti i parë që është shpallur më i miri në sezonin 2025/26 të Superligës së Kosovës.
Veliu, që është pjesë e Prishtinës ka fituar çmimin “Ylli i Javës” për xhiron e parë të kampionatit, ka njoftuar Federata e Futbollit të Kosovës (FFK), të martën.
Vlerësimin e më të mirit të javës e ka bërë Komisioni i Veteranëve të futbollit, që ka vlerësuar lartë paraqitjen e Veliut në fitoren e ngushtë të Prishtinës në udhëtim te Dukagjini me rezultatin e ngushtë 3:2.
Veliu ishte më i merituari që Prishtina e nisi kampionatin me fitore dhe u kthye nga Klina me tri pikë, pasi në këtë triumf nuk kontribuoi vetëm me gol por edhe asistim përgjatë 84 minutave sa luajti.
Vet Veliu është shprehur tejet i lumtur me vlerësimin dhe çmimin e fituar të futbollistit më të mirë të xhiros së parë.
Ai ka thënë se është ambientuar shumë mirë te Prishtina dhe fitorja me Dukagjinin është motiv për të vazhduar me paraqitje të mira edhe në ndeshjet tjera.
Veliu ka shtuar se çmimi “Ylli Ii Javës” do ta motivojë për të punuar edhe më shumë, në mënyrë që ta ndihmojë ekipin në secilën ndeshje deri në fund të sezonit.
Për fund, Veliu ka thënë se Prishtina jo vetëm në këtë sezon por në secilin sezon e ka për synim titullin e kampionit apo daljen në Evropë.
