Autori: Driton Sadiku
Shiritat iu vunë e përdorimi iu ndalua.
Këto objekte, këtu në afërsi të burgut në Mitrovicë të veriut, prej vitesh përdoreshin nga qytetarët serbë.
Veçse për to, leje s’patën asnjëri.
Por jo më, meqë kjo e fundit, u kërkoi përdoruesve lirimin e tyre.
“Me kërkesë të burgut të Mitrovicës kemi filluar në këtë pjesë për ta bërë lirimin, për shkaqe të sigurisë. Për momentin i kemi ndjekur të gjitha procedurat ligjore siç janë njoftimet e shfrytëzuesve apo uzurpatorëve. Ne u kemi jap afat prej 15 ditëve për t’i ofruar të gjitha dokumentet nëse kanë në dispozicion”, ka thënë Hajdini.
E meqë afati i parë s’u përfill, Trepça u dha ultimatum vetëm 48 orë.
“Ne do të veprojmë në harmoni me ligjin, ligji e parasheh lirimin e pronave, ne jemi titullar të pronës dhe këto 20 baraka që janë këtu planifikojmë t’i lirojmë për shkaqe të sigurisë”, u shpreh tutje Hajdini.
Për këtë u njoftuan edhe policia, që të jenë prezent kur të filloj lirimi.
Pronat e uzurpuara të Treçpës, sipas njohësit të sigurisë, Arben Dashevci, duhet të kthehen të gjitha.
“Nuk mund të qëndrosh diku në mënyrë ilegale, ka kaluar koha e ilegalitetit në veri, dhe ti ose do ta paguash qiranë, ose duhet ta lëshosh pronën”, ka thënë Dashevci.
E veç këtyre garazheve, ndërmarrja Trepça ka edhe dhjetëra prona të tjera në veri të vendit, të cilat janë të uzurpuara, e që aktualisht ndërmarrja është në fazën e evidentimit të tyre para se të filloi me urdhrat për lëshim.
