Të paktën 25 palestinezë, përfshirë persona që po kërkonin ndihma ushqimore, u vranë dhe qindra të tjerë u plagosën gjatë sulmeve të reja izraelite në Gaza të mërkurën, raportoi agjencia palestineze e lajmeve Wafa, duke cituar burime mjekësore.
Tre palestinezë u vranë dhe disa të tjerë u plagosën nga një sulm izraelit në rrugën Al-Mansoura, në lagjen Shejaiya, në lindje të qytetit të Gazës.
Tetë persona të tjerë u vranë nga të shtënat izraelite ndërsa përpiqeshin të siguronin ndihma humanitare në zonën Nitzarim në Gazën qendrore.
Sipas burimeve mjekësore, ekipet e shpëtimit nxorën trupat e tre palestinezëve dhe shpëtuan pesë të mbijetuar nga rrënojat e dy shtëpive në Jabalia Al-Nazla, në veri të Gazës, pas një sulmi ajror izraelit. Disa persona ende konsiderohen të zhdukur nën rrënoja.
Dhjetë palestinezë u vranë dhe të tjerë u plagosën në një tjetër sulm izraelit ndaj dy banesave në qytetin Deir al-Balah dhe kampin e refugjatëve Nuseirat, në Gazën qendrore.
Ekipet e shpëtimit gjetën trupin e një të riu nga qyteti Abasan, në lindje të Khan Younis, në jug Gazës.
Duke injoruar thirrjet ndërkombëtare për armëpushim, ushtria izraelite ka vijuar ofensivën e saj brutale ndaj Gazës që nga tetori i vitit 2023, duke vrarë mbi 56.000 palestinezë, shumica gra dhe fëmijë.
Në nëntorin e kaluar, Gjykata Ndërkombëtare Penale lëshoi urdhërarreste për Kryeministrin izraelit Benjamin Netanyahu dhe ish-ministrin e Mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu përballet me një padi për gjenocid në Gjykatën Ndërkombëtare të Drejtësisë për luftën e tij në këtë enklavë.
