Ushtria izraelite vlerëson se ka dëmtuar ndjeshëm aftësinë e Iranit për të qëlluar me breshëri të mëdha raketash drejt Izraelit.
Irani tani po qëllon me breshëri më të vogla raketash pas gjashtë ditësh sulmesh ajrore izraelite që kanë shkatërruar një numër të madh lëshuesish raketash balistike, kanë prishur strukturën komanduese të ushtrisë iraniane dhe e kanë detyruar Iranin të nxitohet të zhvendosë asetet e tij raketore më tej në lindje.
Lëshimi i fundit i raketës balistike iraniane drejt Izraelit të mërkurën në mbrëmje përbëhej nga një raketë e vetme, sipas Forcave të Mbrojtjes së Izraelit (IDF).
Ushtria izraelite ka shkatërruar deri tani afërsisht 40% të lançuesve të raketave balistike të Iranit, tha zyrtari për CNN
Izraeli ka vrarë gjithashtu komandantë të lartë iranianë përgjegjës për mbrojtjen ajrore, gjë që zyrtari tha se ka prishur aftësinë e Iranit për të koordinuar në mënyrë efektive lëshimet e raketave.
Dhe me avionët luftarakë izraelitë që tani operojnë lirshëm mbi qiellin e Iranit perëndimor pas sulmeve ndaj aseteve të mbrojtjes ajrore, Irani është përpjekur të zhvendosë shumë nga lëshuesit e raketave balistike në lindje.
Ushtria izraelite gjithashtu ka penguar në mënyrë aktive lëshimet e raketave iraniane që janë në zhvillim e sipër. “Kur i shohim, ne qëllojmë ndaj tyre”, tha zyrtari ushtarak izraelit.
Megjithatë, Izraeli nuk e di nëse aftësitë e Iranit janë degraduar përgjithmonë dhe nëse Irani nuk do të jetë në gjendje të rifillojë së shpejti sulme më të mëdha.
