Përfaqësuesja Speciale e Sekretarit të Përgjithshëm (PSSP) dhe shefja e UNMIK-ut, Caroline Ziadeh ka shprehur shqetësim për mbylljen e strukturave paralele në veri të Kosovës.
Në një postim në Facebook nga UNMIK thuhet se ajo ka bërë thirrje që këto mbyllje dhe çështje të tjera të pazgjidhura të diskutohen përmes dialogut Kosovë-Serbi.
“PSSP Ziadeh është e shqetësuar për mbylljen e zyrave të financuara nga Serbia në veri të Kosovës dhe ndikimin negativ të këtyre mbylljeve në jetën e përditshme të individëve dhe njerëzve që mbështeten në këto shërbime për mbështetje kritike. PSSP-ja përsërit thirrjet e saj që këto mbyllje dhe çështje të tjera të pazgjidhura të diskutohen në mënyrë konstruktive dhe me mirëbesim brenda dialogut të lehtësuar nga BE-ja”, thuhet në njoftimin e UNMIK-ut.
Të premten Policia e Kosovës mbylli katër qendra ilegale në veri, të cilat sipas Policisë u shfrytëzuan për t’u bërë presion serbëve për ta votuar Listën Serbe në zgjedhjet e 9 shkurtit.
