Publicisti Kim Mehmeti ka reaguar ndaj kritikave për pjesëmarrjen e tij në protestat e mbajtura në Shqipëri, duke theksuar se ai merr pjesë si individ dhe jo si përfaqësues i ndonjë institucioni apo subjekti politik.
Në emisionin “Këndi i Kimit” në Tëvë1, Mehmeti komentoi edhe pretendimet se përfaqësues të koalicionit VLEN po përdoren kundër kryeministrit të Shqipërisë, Edi Rama.
Sipas tij, këto janë interpretime politike që bëhen nga kundërshtarët.
“Ata vetë e bëjnë këtë, sepse xhelozia politike është e tillë. Thonë se Edi Rama e do BDI-në, ndërsa neve nuk na do dhe se synon të na rrëzojë. Këto janë narrativat që ndërtohen politikisht”, ka deklaruar Mehmeti.
Ai foli edhe për krahasimet që, sipas tij, bëhen mes tij dhe deputetëve të VLEN-it, duke theksuar se pozita e tij nuk mund të barazohet me atë të zyrtarëve shtetërorë.
“Kam dëgjuar që thonë: ‘Pse Kim Mehmeti e kritikon dhe e lejojnë, ndërsa neve jo?’ Ata harrojnë se janë deputetë dhe përfaqësojnë institucione. Po të mos ishin deputetë, askush nuk do t’i njihte për atë cilësi. Unë jam Kim Mehmeti. Nuk përfaqësoj asnjë institucion, nuk përfaqësoj VLEN-in dhe nuk përfaqësoj asnjë shqiptar të Maqedonisë së Veriut. Unë përfaqësoj vetëm veten”, ka thënë ai.
Mehmeti shtoi se ekziston një dallim i madh mes një qytetari dhe një zyrtari që mban funksion publik.
“Kur ke pasaportë diplomatike, përfaqëson institucionin dhe çdo veprim i yti ka karakter institucional. Unë kam qenë dhe do të marr pjesë në protesta, por si Kim Mehmeti, një shqiptar nga Maqedonia e Veriut. Shqipëria është mëmëdheu im dhe më intereson po aq sa çdo shqiptar tjetër. Kur mendoj se është në rrezik, unë dal dhe protestoj, por jo në emër të ndonjë institucioni”, ka deklaruar Mehmeti.
