UEFA ka bërë një tjetër delegim të gjyqtarëve nga Kosova në garat evropiane, ka njoftuar Federata e Futbollit të Kosovës (FFK), të martën.
Pas zyrtarëve që do ta drejtojnë ndeshjen në Vjenë ndërmjet Rapidit dhe Santa Colomas, edhe katër gjyqtarë tjerë do të jenë në krye të detyrës për një duel të kthimit në kuadër të raundit të dytë kualifikues të Ligës së Konferencës.
Bëhet fjalë për gjyqtarin ndërkombëtar Mervan Bejtullahu, të cilit i është besuar drejtimi i ndeshjes Ilves – Stjarnan, që zhvillohet të enjten nga ora 18:00 në Tampere të Finlandës.
Bejtullahu do të asistohet nga Edmond Zeqiri e Bashkim Hyseni, ndërsa gjyqtar i katërt do të jetë Alban Shala.
“Ky delegim përfaqëson një tjetër vlerësim të rëndësishëm nga UEFA dhe dëshmi të besimit të vazhdueshëm në profesionalizmin, përgatitjen dhe cilësinë e gjyqtarëve kosovarë në arenën ndërkombëtare”, ka shkruar FFK.
Gjithashtu, FFK I ka dëshiruar suksese ekipit të gjyqtarëve dhe një paraqitje sa më të mirë në këtë sfidë evropiane.
