Me këngën e rok grupit të famshëm anglez “The Beatles”, ‘Come Together’, që nënkupton “Të gjithë bashkë”, përzgjedhësi i Kombëtares angleze, Thomas Tuchel, e ka publikuar listën e futbollistëve të ftuar për Kupën e Botës, “SHBA-Kanada-Meksikë 2026”.
26 futbollistë janë ftuar nga trajneri gjerman që llogaritë në ta, në Botërorin që nis muajin e ardhshëm, në të cilin “Tre Luanët”, janë ndër favoritët kryesorë për trofeun e kampionit të Botës.
Megjithë moton e këngës së famshme, lista ka përçarë shumë tifozët dhe opinionin në Angli, për lënien jashtë të disa nga yjeve të kombëtares angleze.
Tuchel, pritet të shkaktojë debat të madh, pasi ka lënë jashtë emra të njohur si, Harry Maguire, Trent Alexander -Arnold, Phil Foden, Cole Palmer e Fikayo Tomori.
Sipas mediave britanike, vendimi i Tuchel lidhet drejtpërdrejt me formën jo stabile të lojtarëve e në veçanti për Foden e Palmer.
Në portë nuk pati shumë befasi. Dean Henderson, Jordan Pickford e James Trafford janë portierët e ftuar te Anglia.
Në mbrojtje, Tuchel do të ketë të gatshëm, Reece James, Tino Livramento, Marc Guehi, Ezri Konsa, John Stones, Jarell Quansah, Nico O’Reilly, Dan Burn dhe Djed Spence.
Nga mesfushorët janë ftuar: Declan Rice, Elliot Anderson, Jude Bellingham, Jordan Henderson, Morgan Rogers, Kobbie Mainoo dhe Eberechi Eze.
Sulmit i prin kapiteni Harry Kane bashkë me Ivan Toney, Ollie Watkins, Bukayo Saka, Noni Madueke, Marcus Rashford dhe Anthony Gordon.
Anglia në Botëror është në grupin L me Kroacinë, Ganën dhe Panamanë.
