Presidenti i ShBA-së, Donald Trump, ka miratuar zyrtarisht një marrëveshje historike me Arabinë Saudite, e cila do t’i mundësojë vendit zhvillimin e një programi bërthamor civil, raportoi “The Wall Street Journal”.
Duke cituar zyrtarë amerikanë, gazeta tha se marrëveshja, e cila do të zgjasë 30 vjet, vlerësohet të ketë një vlerë prej dhjetëra miliarda dollarësh.
Sipas raportit, marrëveshja synon t’u japë kompanive amerikane një rol qendror në zhvillimin e infrastrukturës bërthamore të Arabisë Saudite, duke përjashtuar njëkohësisht konkurrentët e tjerë të huaj.
Një nga përbërësit kryesorë të marrëveshjes së re do të parashikonte që kompanitë amerikane të ndërtonin një impiant për pasurimin e uraniumit në Arabinë Saudite, nëse një shqyrtim i përbashkët nga Uashingtoni dhe Riadi arrin në përfundimin se një hap i tillë është i justifikuar.
Në raport thuhet se marrëveshja do t’i jepte ShBA-së një rol në mbikëqyrjen e ambicieve bërthamore të Arabisë Saudite, gjë që, sipas zyrtarëve të administratës Trump, mund të ndihmojë në parandalimin e përdorimit të programit për zhvillimin e armëve.
Megjithatë, marrëveshja, e cila pritet t’i dërgohet Kongresit për shqyrtim në ditët në vijim, ka të ngjarë të përballet me kundërshtimin e ligjvënësve të shqetësuar për zgjerimin e kapaciteteve bërthamore në Lindjen e Mesme./trtballkan/
