Presidenti i ShBA-së, Donald Trump ka deklaruar se udhëheqësit e rinj në Iran kanë shprehur gatishmërinë për dialog, megjithëse ai theksoi se ata “duhet të kishin vepruar më shpejt”.
Këto komente vijnë në mes të një fushate të ashpër ushtarake dhe raportimeve për humbje të mëdha në radhët e zyrtarëve të lartë iranianë.
Gjatë një interviste të dielën në mëngjes për revistën The Atlantic, Trump i konfirmoi gazetarit Michael Scherer se administrata e tij është e hapur për të negociuar.
“Ata duan të flasin dhe unë kam rënë dakord të flas, kështu që do të flas me ta,” u shpreh Presidenti, duke shtuar se pala iraniane vonoi vendimin për një hap që sipas tij ishte “shumë praktik dhe i lehtë për t’u bërë më shpejt”.
I pyetur me këmbëngulje nga gazetari se kur do të rinisin këto bisedime, Trump refuzoi të jepte një afat kohor, duke u përgjigjur shkurt: “Nuk mund t’jua them këtë”.
Presidenti nuk specifikoi se me cilët zyrtarë iranianë po komunikon aktualisht Uashingtoni, por theksoi se shumë nga kontaktet e tyre të mëparshme nuk jetojnë më. “Shumica e atyre njerëzve kanë ikur… sepse kjo ishte një sukses i madh,” tha ai, duke theksuar se një marrëveshje mund të ishte arritur shumë më parë.
Këto deklarata marrin një peshë edhe më të madhe duke pasur parasysh kontekstin e zhvillimeve në terren. Vetëm pak kohë para kësaj interviste, Trump i tha një gazetari tjetër se plot 48 udhëheqës iranianë janë vrarë si pasojë e sulmeve të vazhdueshme dhe të koordinuara nga Shtetet e Bashkuara dhe Izraeli ndaj Iranit.
Mbetet e paqartë se cili do të jetë formati i këtyre bisedimeve të reja apo se kush do ta përfaqësojë palën iraniane në këtë tryezë të mundshme dialogu.
