Presidenti amerikan Donald Trump e ka mirëpritur presidentin kinez Xi Jinping në SHBA, duke ndërmarrë hapin e pazakontë të përshëndetjes së udhëheqësit kinez në pistën e Bazës së Përbashkët Andrews për të nisur vizitën e tij shtetërore në Uashington.
Aeroplani i Xi u prit me një ceremoni madhështore mbërritjeje që përfshinte një qilim të kuq 30 metra të gjatë të shoqëruar nga anëtarë të shërbimit amerikan, një fluturim ushtarak nga dy bombardues B-1 dhe një prezantim të flamujve dhe himneve kombëtare të të dy vendeve, ka shkruajtur Guardian.
Presidentët amerikanë zakonisht i mirëpresin udhëheqësit e huaj në Shtëpinë e Bardhë, por Trump dhe zonja e parë, Melania, udhëtuan për në bazën ushtarake në Maryland, pak jashtë Uashingtonit, për t’i shtrënguar duart personalisht Xi dhe gruas së tij, Peng Liyuan, të mërkurën në mbrëmje.
Vizita e Xi vjen ndërsa udhëheqësit botërorë mblidhen në Nju Jork për Asamblenë e Përgjithshme të Kombeve të Bashkuara , megjithëse udhëheqësi kinez nuk do të mbajë një fjalim në takim. Ai ka marrë pjesë në Asamblenë e Përgjithshme të OKB-së vetëm një herë që kur u bë president në vitin 2012.
Sekretari i thesarit i SHBA-së, Scott Bessent, njoftoi se SHBA-të dhe Kina ranë dakord të mërkurën për të zgjatur të ashtuquajturën marrëveshje të Busanit – një armëpushim i përkohshëm tregtar midis dy ekonomive më të mëdha në botë.
Bessent, i cili u takua me zëvendëskryeministrin kinez He Lifeng më herët të mërkurën, i tha Fox News se marrëveshja do të zgjatet deri më 10 janar, dy muaj pasi ajo duhej të skadonte.
Lufta tregtare që po zien është një nga shumë çështjet e ashpra me të cilat Trump dhe Xi duhet të përballen gjatë vizitës, duke përfshirë garën në zhvillimin e inteligjencës artificiale dhe paqëndrueshmërinë gjeopolitike gjatë vizitës dy-ditore.
Shtëpia e Bardhë ka ftuar liderë të mëdhenj të teknologjisë, siç janë drejtuesit nga OpenAI, Apple, xAI, Microsoft, Nvidia, Meta dhe të tjerë, në një darkë shtetërore që do të mbahet për Xi të enjten.
