Eliminimi i hershëm nga gara e Kupës së Kosovës, e mbi të gjitha nga një skuadër e Ligës së Parë, ishte me pasoja për trajnerin e Ballkanit, Artim Pollozhani.
Trajneri shkupjan që mori drejtimin e skuadrës kampione pas largimit të Ilir Dajës, ka dhënë dorëheqje të mërkurën, menjëherë pas ndeshjes me Rilindja 1974, nga e cila pësoi në nismë të Kupës së Kosovës.
Skuadra e udhëhequr nga Faruk Statovci, eliminoj Ballkanin pas penalltive me rezultat 10:9, derisa ndeshja në kohën e rregullt dhe pas vazhdimeve ishte 1:1.
“Meqenëse rezultatet e fundit nuk përkojnë aspak me objektivat e klubit, Artim Pollozhani ka dhënë dorëheqje nga pozita e trajnerit, menjëherë pas humbjes së sotme.
Duke i uruar Pollozhanit suksese, klubi e ka pranuar dorëheqjen e tij, ndërsa gjatë ditëve vijuese do të ju njoftojmë për timonjerin që do të vijë në krye të skuadrës|, ka shkruar FC Ballkani në Facebook.
Ballkani edhe në Superligë në javën e fundit pësoj nga Drita, derisa nuk ka fituar në tri duelet e fundit, në të gjitha garat, duke u pozicionuar në vendin e tretë në tabelë, me 26 pikë, dy më pak se Malisheva e dyta dhe tetë më pak se Drita lidere.
