Ministri për Punë, Familje dhe Vlerat e Luftës Çlirimtare, Andin Hoti, ka njoftuar se Marrëveshja për Sigurime Sociale ndërmjet Kosovës dhe Austrisë pritet të kalojë së shpejti procedurat e nevojshme dhe të nënshkruhet.
Këtë e ka bërë të ditur Hoti pas një takimi me ambasadorin e Austrisë në Kosovë, Georg Schnetzer, i shoqëruar nga Rita Glavitza, udhëheqëse e Zyrës Koordinuese të Agjencisë Austriake për Zhvillim (ADA) në Prishtinë.
Sipas ministrit, gjatë takimit është diskutuar për avancimin e bashkëpunimit zhvillimor ndërmjet dy vendeve, shkëmbimin e përvojave dhe shfrytëzimin e ekspertizës austriake në sektorët që mbulon ministria.
Hoti ka theksuar se teksti i Marrëveshjes për Sigurime Sociale tashmë është dakorduar dhe se nënshkrimi i saj pritet të ndodhë pas përfundimit të procedurave përkatëse.
Ai ka bërë të ditur se marrëveshja do të mundësojë njohjen dhe bashkërendimin e periudhave të sigurimit, si dhe realizimin e të drejtave pensionale për qytetarët që kanë punuar në Kosovë dhe Austri.
Ministri Hoti ka falënderuar Austrinë për përkrahjen e vazhdueshme ndaj Kosovës, duke e cilësuar atë si një shtet mik dhe mbështetës të rëndësishëm të vendit./teve1.info/







