Tri raste të vrasjeve në tentativë janë raportuar se kanë ndodhur brenda 24-orëve të fundit në Kosovë, dy prej tyre në Fushë-Kosovë e një në Gjakovë.
Sipas Policisë, në njërin rast që ka ndodhur në Fushë Kosovë një person është plagosur në këmbë pas një përleshjeje në mes dy grupeve, ndërsa lidhur me rastin janë arrestuar tre persona.
“Është raportuar për një përleshje në mes dy grupeve ku si pasojë një person mashkull kosovar është plagosur në këmbë nga arma e zjarrit, i cili pas tretmanit mjekësor në QKUK është liruar. Në vendin e ngjarjes janë gjetur dhe sekuestruar dy gëzhoja. Lidhur me rastin, janë arrestuar tre të dyshuar meshkuj kosovarë dhe me vendim të prokurorit janë dërguar në mbajtje”, thuhet në raport.
Në rastin tjetër që ka ndodhur po ashtu në Fushë Kosovë në mes dy grupeve bëhet e ditur se një person ka pësuar lëndime trupore.
“Raportohet se pas një përleshje në mes dy grupeve, si pasojë lëndime trupore ka pësuar viktima mashkull kosovar i cili është dërguar për tretman mjekësor në QKUK. Lidhur me rastin është njoftuar prokurori, derisa njësitë policore janë duke u marrë me procedurat e mëtejme hetimore”, bëhet e ditur në raportin 24 orësh të Policisë.
Ndërkaq, në rastin që ka ndodhur në Gjakovë pesë persona kanë mbetur të lënduar si pasojë e një përleshjeje fizike mes tyre pas një mosmarrëveshjeje.
“Raportohet se pas një mosmarrëveshje janë përleshur fizikisht disa persona, ku si pasojë pesë prej tyre (të dyshuar meshkuj) kanë pësuar lëndime trupore dhe kanë pranuar tretman mjekësor. Lidhur me rastin me vendim të prokurorit, të dyshuarit janë arrestuar dhe pas intervistimit, tre të dyshuar dërgohen në mbajtje, ndërsa një lirohet në procedurë të rregullt”, thuhet në raport.
