Pasi e fitoi Kupën e Kosovës pas 21 vjet pritjeje, Trepça është kthyer edhe në finale të play-offit. Në finale do të paraqitet për herë të parë që nga viti 2017.
Finalen e plejofit në Superligën e Kosovës në hendboll, Trepça e siguroi të dielën pasdite në Prishtinë. Fitoi ndaj skuadrës prishtinase me rezultat 32:31, për triumfin e dytë në serinë gjysmëfinale të plejofit.
Javën e kaluar, po në Prishtinë, Trepça e fitoi Kupën e Kosovës pas pritjes prej plot 21 vjetësh për trofe. Në gjysmëfinale të Kupës e kishte mposhtur Prishtinën e në finalen dramatike e mposhti Besa Famgasin.
Të trimëruar nga suksesi në Kupë, mitrovicasit synojnë edhe titullin e kampionit. Fitorja e dytë e Trepçës ndaj Prishtinës u sigurua me gol në minutën e 59-të. Në fakt, edhe barazimi u mjaftonte “xehetarëve” për të kaluar në finale. Por Deniz Terziqi shënoi golin për 32:31 në minutën e parafundit. Më herët, te rezultati 31:31, Oltion Beshiri i Prishtinës dështoi nga penalltia.
Deri në minutën e 25-të, Prishtina ishte në epërsi, që shkoi deri në tri gola. Por më pas Trepça kaloi para dhe pjesën e parë e përfundoi 15:14. Shpejt epërsia shkoi në 18:14, kurse në minutën e 47-të Prishtina barazoi në 26:26. Më pas u luajt ndeshje e barabartë deri në fund.
Deniz Terziqi e Yassine Henahen i shënuan nga shtatë gola për Trepçën. Shpëtim Mehmeti i kishte gjashtë, ndërsa Lulzim Shabani pesë. Te Prishtina më efikasi ishte Sergio Barreto me dhjetë gola. Gjashtë i kishte Albi Gjuka, ndërsa pesë i shënoi Rron Ramadani.
