Ndonëse është mposht në fushë nga Feronikeli ’74, por Trepça ’89 është ajo që do të luajë në çerekfinale të Kupës së Kosovës, kështu ka njoftuar edhe FFK-ja.
Ekipit mitrovicas i është aprovuar ankesa e pretenduar se skuadra nga Drenasi ka aktivizuar lojtarë që nuk janë të regjistruar sipas rregullores për regjistrim, statustin dhe transferimin e lojtarëve.
Nikli e kishte fituar ndeshjen 1:0 në një të tetën e finales së Kupës së Kosovës, e zhvilluar me datë 4 shkurt në Drenas. Rezultati i ndeshjes nuk ishte regjistruar nga Komisioni i Garave, derisa këtë martë ky Komisioni e ka regjistruar me rezultat zyrtar 3:0 në të mirë të skuadrës mitrovicase.
“Miratohet si e bazuar ankesa e Trepçës ’89 dhe ndeshja e 1/8 së finales së Kupës së Kosovës Feronikeli 74 – Trepça ‘89 regjistrohet me rezultat zyrtar 3:0 në favor të Trepçës ’89. Komisioni i Garave ka konfirmuar se për klubin nga Drenasi në atë ndeshje kanë luajtur pa të drejtë Armend Blakqori, Donat Hasani, Fitim Susuri, Adem Maliqi, Endrit Baholli dhe Shpresim Zogu”, shkruhet në këtë vendim.
Sipas Komisionit, deri më 4 shkurt nuk kishte njoftim për regjistrimin e këtyre lojtarëve përmes platformës FIFA Connect.
Feronikeli ’74 luan në Ligën e Parë të Kosovës. Është klub i ri në fakt, që shfrytëzon të gjitha asetet e klubit nga Drenasi, Feronikeli, zyrtarisht i shuar. Feronikeli ’74 ka startuar me gara në Ligën e Parë, falë një fuzionimi që vazhdon të mbetet shumë i dyshimtë. Klubi i sapoformuar ishte fuzionuar me klubin Fortuna të Ligës së Dytë dhe me një vendim të pasqaruar ndonjëherë nisi garat në Ligën e Parë.
Feronikeli 74 është lider në Grupin A të Ligës së Parë dhe në rrugë të mirë për kalim në Superligë. Trepça ’89 garon në Superligë dhe është në garë për mbetje në elitë.
