Deputetja e Lëvizjes Vetëvendosje, Liza Gashi, ka deklaruar se partia e saj ka qenë e hapur që nga fillimi për bashkëpunim me opozitën në procesin e zgjedhjes së presidentit.
Ajo theksoi se LVV-ja u ka kërkuar vazhdimisht partive si LDK dhe PDK që të propozojnë emra konkretë, madje duke ofruar edhe mbështetje me nënshkrime për kandidatët e tyre, duke pasur parasysh mungesën e numrave nga ana e opozitës për të nominuar vetë një kandidat.
Sipas Gashit, qëllimi i LVV-së mbetet arritja e një kandidati konsensual që do të mbështetej nga të gjitha partitë politike, ndërsa shtoi se do të ketë konsultime të mëtejshme edhe me PDK-në për këtë çështje. Ajo nënvizoi se sigurimi i votave të mjaftueshme është thelbësor për të shmangur vendin nga zgjedhjet e jashtëzakonshme.
“Që nga dita e parë kemi pasur vullnet dhe gatishmëri që ta votojmë një kandidat konsensual, për të cilin dakordohen të gjitha partitë politike. Ne do të kemi konsultime edhe me PDK-në. E ka thënë edhe Kurti, nuk është e mjaftueshme të jemi vetëm 80 persona në sallë, duhet të jenë 84, 85 që të sigurohemi. VV-ja është e prerë, që mos ta çojmë vendin në zgjedhje. Zgjedhjet kushtojnë 10 milionë euro, plus fakti që jemi në një krizë globale me shumë të panjohura”, tha ajo në emisioni “Info Nata” në Tëvë1.
Megjithatë, Gashi hodhi poshtë idenë e dakordimit pa emra konkretë, duke kritikuar qasjen që e cilësoi si “blanko”, duke thënë se nuk është e mundur të mbështetet një kandidat pa ditur identitetin e tij.
“Për t’ia ofruar VV-ja emrin e presidentit opozitës duhet pasur emra konkretë, por nuk mundemi të shkojmë te formati blanko i PDK-së. Unë as vetës nuk do t’i besoja po të vija me një propozim blanko. Si ka mundësi që një parti mendon se një deputete e voton blanko një çek për të cilin nuk e di as emrin as mbiemrin? Është e pamundur dakordimi pa emër, është e pamundur të lëvizim te hapi i dytë, pa e kaluar të parin, i pari është prezantimi i emrave e pastaj të ecim tutje”, deklaroi ajo.
/teve1.info/
