Kryetari i Lidhjes Demokratike të Kosovës, Lumir Abdixhiku, ka reaguar pas ndarjes nga jeta të ish-kongresistit amerikan Eliot Engel, duke e cilësuar atë si një nga miqtë më të mëdhenj të Kosovës.
Në një mesazh ngushëllimi, Abdixhiku theksoi se Engel ishte ndër zërat më të fuqishëm në mbështetje të së drejtës së popullit të Kosovës, sidomos në periudhat më vendimtare për fatin e vendit.
Ai vuri në pah edhe raportin e veçantë që Engel kishte me presidentin historik Ibrahim Rugova, si dhe mbështetjen e tij të vazhdueshme për vizionin e një Kosove të lirë, të pavarur dhe demokratike. Abdixhiku kujtoi se për këtë kontribut, Engel ishte dekoruar me Medaljen e Artë të Lirisë në vitin 2004.
Sipas tij, roli i Engel në promovimin e çështjes së Kosovës dhe në forcimin e marrëdhënieve me Shtetet e Bashkuara të Amerikës ka qenë i jashtëzakonshëm dhe i pazëvendësueshëm.
Abdixhiku përfundoi duke shprehur ngushëllime për familjen Engel, popullin amerikan dhe qytetarët e Kosovës, duke theksuar se kontributi i tij do të mbetet i përhershëm në historinë e shtetit. /teve1.info/
