Policët e Njësisë së Komunikacionit Rrugor në Ferizaj kanë shqiptuar masa ndëshkuese ndaj tre shoferëve për tejkalim të shpejtësisë së lejuar.
Më 11 nëntor 2025, rreth orës 21:20, në rrugën magjistrale Ferizaj – Prishtinë, në Babush (zona me kufizim 50 km/h), është ndaluar A.B. (22), i cili drejtonte VW Golf me 124 km/h.
Ai u gjobit me 300 euro, mori 3 pikë negative dhe iu hoq patenta për 3 muaj.
Ndërkaq, më 12 nëntor 2025, rreth orës 18:30, në rrugën transitore Shtime – Belincë (zona me kufizim 60 km/h), u ndaluan J.C. (39) dhe D.A. (26), të cilët drejtonin automjete Audi me shpejtësi përkatësisht 123 km/h dhe 126 km/h.
Të dy u gjobitën me nga 300 euro dhe iu hoq patenta për 3 muaj. Njëri prej tyre nuk mori pikë negative pasi posedonte patentë të huaj.
“Policia Rajonale e Ferizajt apelon tek të gjithë shoferët që të respektojnë kufizimet e shpejtësisë, shenjat dhe rregullat e komunikacionit rrugor, me qëllim rritjen e sigurisë në rrugë dhe parandalimin e aksidenteve”, theksohet në njoftim.
