Tradita, kultura dhe trashëgimia e pasur e Mbretërisë së Arabisë Saudite janë prezantuar për herë të parë në Prishtinë përmes ekspozitës ndërkombëtare “Urat”, e cila u hap sot në kryeqytet.
Nën organizimin e Bashkësisë Islame të Kosovës dhe Ministrisë së Çështjeve Fetare të Arabisë Saudite, kjo ngjarje kulturore unike, përmes kësaj ekspozite, sjell një pasqyrë të jetës, zakoneve dhe trashëgimisë së këtij vendi.
Në këtë ekspozitë, përmes seksioneve të veçanta dhe përmbajtjes unike, vizitorët mund të mësojnë më shumë për Arabinë Saudite, historinë e Mekës, dorëshkrimet e çmuara të Bibliotekës së Mekës, botimet e Kuranit, garat ndërkombëtare të leximit të Kuranit, artin e kaligrafisë arabe, si dhe të përjetojnë nga afër ndjesinë e të qenit pranë Qabesë së bekuar përmes teknologjisë së realitetit virtual.
Kryetari i Bashkësisë Islame të Kosovës, Myftiu Naim ef. Tërnava tha se bashkëpunimi ndërmjet Kosovës dhe Arabisë Saudite është i një domethënie të veçantë, kjo edhe për faktin e promovimit vlerave sublime të Islamit.
Kryeministri në detyrë i Kosovës, z. Albin Kurti, tha se përmes kësaj ekspozite po ndërtohen ura bashkëpunimi mes dy vendeve.
Ndërkaq, kryetari i Prishtinës, Përparim Rama, tha se ekspozitat e tilla, më shumë se artistike, janë ftesa për reflektim mbi vlerat që na bashkojnë.
Zëvendësambasadori i Arabisë Saudite në Tiranë, Ahmed el Harabi, tha se ekspozita ndërkombëtare “Urat” ka për qëllim që të zgjerojë rrugët komunikuese me të gjithë botën.
Ekspozita “Urat” mbetet e hapur për publikun deri më 10 maj dhe fton qytetarët e Kosovës të përjetojnë nga afër ngjyrat, aromat dhe tingujt autentikë të kulturës arabe në zemër të Prishtinës.
