Steaua Bukureshti fitoi në mënyrë dramatike në shtëpi ndaj Dritës, e cila ishte në avantazh prej dy golave deri në minutën e 65-të.
Megjithatë, rumunët brenda 25 minutave, arritën ta përmbysin rezultatin dhe ta mposhtin Dritën 3:2 në ndeshjen e parë të raundit të tretë kualifikues të Ligës së Evropës.
Trajneri i ekipit rumun, Elias Charalambous, ka pranuar se është impresionuar nga reagimi i lojtarëve të tij, të cilët arritën të fitonin pas katër humbjeve radhazi.
Trajneri qipriot tashmë po mendon për ndeshjen kundër Unirea Slobozia të dielën, e më pas për ndeshjen e kthimit në Kosovë kundër Dritës.
“Nuk e di nëse fati u kthye kundër nesh, nga pikëpamja ime luajtëm më keq në pjesën e parë. Patëm presion në ndeshjet e kaluara dhe nuk mundëm të tregonim cilësinë tonë. Në pjesën e dytë e pranuam atë gol, ndodh, por treguam një reagim të mirë pasi pësuam golin|, tha ai.
Sipas tij, fitoren ndaj Dritës ia dedikojnë tifozëve të klubit por insistoi se kualifikimi në “play-off” të Ligës së Evropës do të vendoset javën e ardhshme në Prishtinë.
“Kualifikimi do të vendoset në Kosovë, pas një jave. Atje do të duhet të fillojmë nga e para, do të jetë shumë e vështirë, duhet të përgatitemi për një ndeshje shumë të vështirë atje”, tha Charalambous.
