Reprezentuesi i Kosovës, Edon Zhegrova ishte protagonist në fitoren e Lillet ndaj Fenerbahçes në kuadër të ndeshjes së parë të raundit të tretë kualifikues të Ligës së Kampionëve.
Lille triumfoi 2:1 të martën mbrëma në shtëpi, falë golit të shënuar nga Zhegrova në fund të takimit.
Zhegrova në këtë ndeshje u inkuadrua nga stoli në minutën e 71-të, ndërsa pas 20-të minutave lojë realizoi gol.
Ai shënoi në minutën e parë të kohës shtesë për t’ia siguruar Lillet fitoren dhe avantazhin para ndeshjes që kthimit që luhet javën e ardhshme në Stamboll.
Për Zhegrovën, i cili ishte ndër lojtarët kryesor të ekipit francez sezonin e shkuar, ky është goli i parë zyrtar në sezonin 2024/25.
Trajneri i ri i Lillet, Bruno Genesio ka pasur fjalë të mëdha për 25-vjeçarin, të cilin e ka vlerësuar lart.
“Sa i përket Edon Zhegrovës, ai i përmbushi pritjet e mia kur hyri në lojë dhe ishte shumë i rëndësishëm. Kështu që, besoj se ai do të jetë për ne i rëndësishëm edhe këtë sezon”, ka thënë Genesio.
Zhegrova ka kontratë deri në vitin 2026 me Lillen, ekip që iu bashkua në janar të vitit 2022 nga Baseli i Zvicrës.
Sezonin e shkuar, ai shënoi 12 gola dhe bëri 10 asistime në 47 paraqitje për Lillen në të gjitha garat.
