Në këtë formë po kyçet në anën tjetër të rrugës.
Si kjo veturë, njëlloj po detyrohen të kalojnë edhe shumë të tjera.
Por kjo pjesë e udhëkryqit në fshatin Besi të Prishtinës, është shndërruar në shqetësim për banorët.
Qytetarët e kësaj zone thonë se ndjehen të rrezikuar nga kjo gjendje.
E për këtë kanë një kërkesë.
“…të jetë një rrethrrotullim këtu për me u shërby këtyre. Nëse Ministria thotë që po shërben për qytetarë duhet me mbështet vullnetin e tyre që kanë bërë peticionin për një rrethrrotullim”, ka thënë Syla.
Ani pse një projekt të tillë, sipas banorëve, Ministria e Infrastrukturës veçse e kishte planifikuar, ai mbeti në gjysmë.
“Fillimisht Ministria ka vendos këtu njëherë edhe këtu veç po shihet vendi që është dëmtuar kjo parcelë. Po kanë ardh një grup njerëzish dhe kanë thënë se po dëmtohen varrezat, e këto nuk janë të tyre. Ne kemi dërguar mbi shtatë kërkesa në Ministri, asnjë përgjigje nuk e kemi marrë, edhe sot isha në Ministri, nuk u takova”, u shpreh tutje Syla.
Të domosdoshëm ndërtimin e një rrethi këtu po e sheh edhe ky banor.
“Është imediat se qindra vetura bëjnë hyrje dalje këtu brenda ditës. Shumë pesëqind apo gjashtëqind vetura. Në këtë rreth kanë qasje dy lagje të fshatit Besi, fshati Rimanishtë, Sharbani ka dalje këndej, Tërrnava, Siqeva. Përveç kësaj i kemi edhe QMF, objektin e Bashkësisë Lokale, kopshti për fëmijë. Tmerr është në çfarë kushte po qarkullojnë njerëzit këtu në këtë udhëkryq”, ka thënë një banorë
Se rrezikshmëria është e lartë thotë edhe Fadil Osmani.
“73 vjet që i kam unë më së paku tridhjetë persona janë mbyt këtu. Ky rreth është shumë i nevojshëm aty. Unë nuk e di se çka kanë prit ata deri sot që mos me zgjedh këtë problem”, i shpreh banori tjetër.
E nëse kërkesa nuk u plotësohet, banorët paralajmërojnë edhe protestë.
“Fshatrat që gravitojnë këtu janë në organizim të protestave masive. Është marrë vendim nëse shpejt nuk ndërmerret diçka me dal edhe me blloku rrugën kryesore. Ajo është e paevitueshme se nuk po shohim rrugëdalje tjetër, janë të revoltuar banorët”, theksoj tutje edhe një banorë.
Gjatë së martës, televizioni tentoi të marrë një përgjigje edhe nga Ministria e Infrastrukturës, por të njëjtit nuk ishin të qasshëm.
