Nëse tiganët tuaj dikur të shndritshëm tani duken më të vjetër se kurrë dhe të shënuar nga betejat pas vitesh përdorimi nën nxehtësi ekstreme, ndoshta nuk keni nevojë të drejtoheni menjëherë te kimikatet e forta apo mjetet e shtrenjta për fërkim.
Ndonjëherë, truket e vjetra janë ato që funksionojnë më mirë, dhe kjo teknikë klasike me dy përbërës është transmetuar brez pas brezi në kuzhina profesionale për të eliminuar njollat e shëmtuara nga ndryshku dhe yndyra.
Ndërsa disa mjete për pastrim të yndyrës mund të jenë shumë të kushtueshme, thjesht duke përdorur një limon dhe pak kripë të trashë mund të arrini të njëjtin shkëlqim duke shpenzuar vetëm disa pak para.
Edhe pse ky truk pastrimi mund të duket si magji, në fakt ka një shkencë të mirëfilltë pas tij.
Lëngu i limonit është i pasur me një kimikat të quajtur acid citrik, një tretësirë e dobët dhe natyrale, e cila, kur aplikohet mbi ndryshk, e kthen oksidin e hekurit nga formë e ngurtë në formë të tretshme që mund të pastrohet lehtësisht.
Në këtë teknikë, kripa e trashë vepron si një substancë gërryese, me anë të vetive të mprehta që ndihmojnë në heqjen e yndyrës më të djegur, duke i dhënë më pas mundësinë lëngut të limonit të bëjë magjinë e tij.
Për yndyrat veçanërisht të vështira për t’u hequr, një zierje e thjeshtë me dy përbërës të tjerë të zakonshëm në shtëpi mund ta ndihmojë procesin që në fillim.
Sipas ekspertit të pastrimit nga “Tom’s Kitchen”, përdorimi i uthullës, sodës së bukës, limonit dhe kripës mund të jetë shumë efektiv për të eliminuar yndyrën. Në një postim në YouTube, ai tha: “Ja çfarë rekomandoj. Nëse mund ta zhytni tiganin tuaj në sodë buke dhe një lugë gjelle uthull për ndoshta 30 minuta, kjo do të ndihmojë në zbutjen e yndyrës së ngjitur.
“Më pas thjesht nxirreni jashtë, priteni gjysmën e një limoni dhe pak kripë – si p.sh. kripë kosher ose ndonjë kripë të trashë për të ndihmuar në fërkimin e njollave.
“Kjo zakonisht funksionon shumë mirë – aciditeti i limonit ndihmon në heqjen e njollave, ndërsa kripa vepron si një furçë gërryese”./telegrafi
