Është baza më e madhe e Shteteve të Bashkuara në Ballkan.
E vendndodhja e saj, është në Ferizaj të Kosovës.
Por, ky fakt, duket se po i pengon grupeve kriminale serbe.
Madje, në platformën “Telegram”, disa prej tyre i bën thirrje Iranit, ta sulmojë edhe kampi amerikan “BondSteel” në Kosovë.
Krejt kjo, pas ngjarjeve të fundit në Lindjen e Mesme.
Për këtë çështje, Tëvë1 të martën i është drejtuar misionit të NATO-s në Kosovë.
Nga KFOR, kanë thënë se aktualisht nuk ka ndryshime të rëndësishme në shqyrtim.
“Forca dhe qëndrimi i KFOR-it rishikohen dhe përshtaten periodikisht, sipas zhvillimit të rrethanave, në mënyrë që misioni të mbetet i përshtatshëm për qëllimin e tij. Aktualisht, nuk ka ndryshime domethënëse që po shqyrtohen”, thuhet në njoftimin e KFOR-it
KFOR ka shtuar se në radhët e veta aktualisht ka pothuajse 600 amerikanë.
Ndërsa ka shtuar se SHBA vazhdon të luaj rol themelor në mbështetjen e sigurisë në të gjithë Kosovën.
Por, sipas tyre, zgjidhja afatgjate për paqe është politike.
“Prania dhe aktivitetet e përditshme të KFOR-it në të gjithë Kosovën krijojnë hapësirë për dialog politik. Stabiliteti në rajon në fund të fundit varet nga zgjedhja e diplomacisë nga të gjitha palët mbi dhunën. Rruga drejt paqes afatgjatë është politike. NATO vazhdon të mbështesë fuqimisht Dialogun e lehtësuar nga BE-ja si kornizë për të zgjidhur çështjet e pazgjidhura me respekt për të drejtat e të gjitha komuniteteve” thuhet tutje në njoftim.
Se nuk ka rrezik potencial e thotë edhe ish-komandanti i Forcës se Sigurisë së Kosovës.
Megjithatë, gjeneral Kadri Kastrati thotë se vigjilenca duhet shtuar edhe nga vet shteti i Kosovës.
Ndryshe, pas zhvillimeve të fundit, Irani ka bombarduar bazat amerikane në Lindjen e Mesme.
