Përçarja brenda Lidhjes Demokratike të Kosovës dhe përplasjet brenda partisë, po bëhen gjithnjë e më të thella.
Të martën, në një debat publik në rrjetet sociale, u përfshin kryetari Lumir Abdixhiku dhe dy deputetët Hykmete Bajrami dhe Avdullah Hoti.
Gjithçka nisi me një kërkesë të këtij të fundit, për konvetë të re të LDK-së.
“KONVENTA duhet të jetë një BASHKIM i madh dhe një moment i ri për LDK-në. Ajo duhet të përcaktojë ekipin që do ta udhëheqë LDK-në drejt fitores në zgjedhjet e ardhshme”, deklaroi Avdullah Hoti nga LDK.
Brenda pak minutash, erdhi përgjigja e kryetarit të LDK-së, Lumir Abdixhiku.
“Mendoja se e kanë për parime e për Kosovë; por beteja qenka për kryetar të LDK-së për njëri-tjetrin. Për keqardhje! Zot, fali, kaq dinë; se populli s’ka për t’i falur!”, tha Abdixhiku.
Ky reagim me akuza i Abdixhikut, nxiti më pas një reagim të ashpër të deputetes Hykmete Bajrami.
“Një humbës i trefishtë, humbës i zgjedhjeve të njëpasnjëshme, i degradimit dhe i përçarjes së partisë, po flet për parime, shtet, dhe ambiciet në LDK. Ju jeni i fundit, ama bash i fundit, që mund të flisni për parime, ambicie, shtet e pushtet, sepse parimet maten me përgjegjësi”, deklaroi Bajrami.
Duke renditur disa nga kritikat kryesore të saj për qeverinë e drejtuar nga Albin Kurti, Bajrami pati një porosi për Abdixhikun.
“Pajtohem: s’rrotullohet shteti për një ambicie. Pikërisht për këtë arsye, le të flasim për shtetin, por, fillimisht, duhet ta bëjmë dallimin mes shtetit dhe karriges. T’i kthehemi shtetit!”, tha ajo.
Bajrami, Hoti dhe katër deputetë të tjerë të LDK-së, kanë konfirmuar tashmë se nuk do ta votojnë për President Bekim Sejdiun, emër që doli nga marrëveshja mes përfaqësuesve të LDK-së dhe Lëvizjes Vetëvendosje.
